രാശ്യാധിപ പൊരുത്തം

രാശ്യാധിപ പൊരുത്തം

ജീവോ ജ്ഞജീവൗ ശുക്രജ്ഞൗ വിസൂര്യാ വികുജാഃ ക്രമാൽ

വീന്ദ്വർക്കാ വികുജേന്ദ്വർക്കാഃ സൂര്യദീനാം തു ബാന്ധവാഃ

ജന്മരാശിപയോരൈക്യം മിഥോ മൈത്രീ ച ശോഭനം. - ഇതി.

സാരം :-

വിവാഹപൊരുത്തത്തിൽ

സൂര്യന് വ്യാഴം ബന്ധുവാണ്.

ചന്ദ്രന് ബുധനും വ്യാഴവും ബന്ധുക്കളാണ്.

ചൊവ്വയ്ക്ക്‌ ബുധനും ശുക്രനും ബന്ധുക്കളാണ്.

ബുധന് ചന്ദ്രൻ ചൊവ്വ വ്യാഴം ശുക്രൻ ശനി എന്നീ അഞ്ചു ഗ്രഹങ്ങളും ബന്ധുക്കളാണ്.

വ്യാഴത്തിന് സൂര്യൻ ചന്ദ്രൻ ബുധൻ ശുക്രൻ ശനി എന്നീ അഞ്ചു ഗ്രഹങ്ങളും ബന്ധുക്കളാണ്.

ശുക്രന് ചൊവ്വ ബുധൻ വ്യാഴം ശനി എന്നീ നാല് ഗ്രഹങ്ങളും ബന്ധുക്കളാണ്.

ശനിയ്ക്ക് ബുധൻ വ്യാഴം ശുക്രൻ എന്നീ മൂന്നു ഗ്രഹങ്ങളും ബന്ധുക്കളാണ്.

ബന്ധുക്കളല്ലാത്ത ഗ്രഹങ്ങൾ ശത്രുക്കളാണെന്നറിഞ്ഞുകൊള്ളണം.

സ്ത്രീ ജനിച്ച കൂറിന്റെയും പുരുഷൻ ജനിച്ച കൂറിന്റേയും അധിപതികൾ ഒരു ഗ്രഹമോ അല്ലെങ്കിൽ അവർ രണ്ടുപേരും അന്യോന്യം ബന്ധുക്കളായോ വന്നാൽ രാശ്യാധിപപൊരുത്തം ശോഭനമാണ്. ഇത് മുഹൂർത്തസംഗ്രഹവചനമാണ്.

----------------------------------------------------

യോ യസ്യ ജന്മേശനിജത്രികോണാ-

ത്സുഖാർത്ഥധീധർമ്മമൃതിവ്യയേഷു

ജാതസ്തദുച്ചേ ച സ തസ്യ മിത്രം

പരേഷു തത്സ്വാമിവശേന ശത്രുഃ. - ഇതി.

സാരം :-

സ്ത്രീപുരുഷന്മാരിൽ ഒരാളുടെ ജനിച്ചകൂറിന്റെ അധിപനായ ഗ്രഹത്തിന്റെ മൂലക്ഷേത്രരാശിയിങ്കൽനിന്ന് 2, 4, 5, 8, 9, 12  എന്നീ രാശിക്കൂറുകളിലും അധിപഗ്രഹത്തിന്റെ ഉച്ചരാശിക്കൂറിലും മറ്റേ ആൾ ജനിച്ചാൽ രാശ്യാധിപ പൊരുത്തമുണ്ട്. മറ്റു കൂറുകളിൽ ജനിച്ചാൽ രാശ്യാധിപ പൊരുത്തം ഇല്ല. ഇവിടെ തത്സ്വാമിവശേന എന്നു പറഞ്ഞതുകൊണ്ടു രണ്ടാളുടേയും ജനിച്ച കൂറുകളുടെ അധിപന്മാർ അന്യോന്യബന്ധുക്കളാകകൊണ്ടാകുന്നു. ഈ പൊരുത്തമുണ്ടായതെന്നറിഞ്ഞുകൊൾക. അവിടെ ഗ്രഹങ്ങളുടെ ബന്ധുശത്രുത്വം മുഹൂർത്തസംഗ്രഹവചനാനുസാരേണയല്ല. സത്യാചാര മതാനുസാരേണയാകുന്നു. ഇത് മാധവീയ വചനമാണ്.